દાહોદ શહેર સહિત જિલ્લામાં હોળી પર્વની રંગે ચંગે ઉજવણી કરાઈ.

દાહોદ

દાહોદ શહેર સહિત જિલ્લામાં અધર્મ પર ધર્મના વિજય સમા હોળી પર્વની એકબીજા પર ગુલાલ ઉડાડી હોળી પર્વની શુભકામનાઓ પાઠવી રંગે ચંગે ઉજવણી કરવામાં આવી હતી.

આઝાદી પહેલાથી દાહોદ શહેરના હાર્દ સમા ગાંધી ચોકની મુખ્ય હોળી એ આજે પણ તેનું મુખ્ય સ્થાન જાળવી રાખ્યું છે. દાહોદ શહેરમાં વર્ષો પહેલા આંગળીના વેઢે ગણાય તેટલા જ વિસ્તારોમાં હોળી પ્રગટાવ વામાં આવતી હતી. પરંતુ સમયના બદલાતા વહેણની સાથે હાલ શહેરના લગભગ તમામ મહોલ્લા, શેરીઓ તેમજ સોસાયટીઓમાં હોળી પ્રગટાવવામાં આવે છે. વર્ષોથી ચાલી આવતી પરંપરા મુજબ શહેરના ગાંધી ચોક ખાતેની મુખ્ય હોળીનું સાંજે નક્કી કરવામાં આવેલ યજમાન સમાજ દ્વારા શાસ્ત્રોક્ત વિધિ સર પૂજા અર્ચન કરાયા બાદ હોળી પ્રગટાવવામાં આવે છે. અને પરંપરા મુજબ શહેરના દરેક વિસ્તારના એક એકવ્યક્તિ પોતાની સાથે લાવેલ મસાલ હોળીની ઝાળથી સળગાવી ખૂબ જ ઝડપથી દોડતા દોડતા પોતાના વિસ્તારમાં જઈ તે મસાલ વડે પોતાના વિસ્તારની હોળી પ્રગટાવે છે વર્ષોથી ચાલી આવતી આ પરંપરા આજે પણ જીવંત રહી આકર્ષણનું કેન્દ્ર બનવા પામી છે. હોળી પ્રગટાવ્યા બાદ લોકો શ્રદ્ધાપૂર્વક હોળીના ફેરા ફરી હોળી તાપી ધન્યતા અનુભવે છે.

ગાંધી ચોકની હોળી તાપવા નજીકના વિસ્તારમાં રહેતા વ્હોરા સમાજના લોકો પણ આવે છે અને હોળીના ફેરા ફરી ધન્યતા અનુભવતા અત્રે કોમી એકતાનુ વાતાવરણ જોવા મળે છે. કેટલાક લોકોએ જવ, તલ હળદરના ગાંઠીયા, લવિંગ તેમજ આખું શ્રીફળ હોળીમાં પધરાવી પોતાની બાધા, માનતા પૂરી કરી ધન્યતા અનુભવી હતી. દર હોળી પર લાકડાના બહોળા વપરાશને કારણે જંગલો અને ઝાડનું નિકંદન નીકળતું હોઈ ઋતુચક્ર અસ્તવ્યસ્ત થઈ જતા પર્યાવરણ દૂષિત થતું હોવાથી પર્યાવરણની જાળવણી માટે જંગલો તેમજ ઝાડોનું નિકંદન થતું અટકાવવું જરૂરી બનતા પર્યાવરણની જાળવણી માટે દાહોદ પ્રકૃતિ મિત્ર મંડળ દ્વારા હોળીમાં લાકડાને બદલે છાણાનો બહોળો ઉપયોગ કરી ઝાડો તેમજ જંગલોનું નિકંદન અટકાવવા કરવામાં આવેલી અપીલને આ વખતે સારું એવો પ્રતિસાદ મળ્યો છે અને શહેરના ગોદી રોડ, હનુમાન બજાર, બહારપુરા સહિત અનેક સ્થળે છાણાંની ઇકોફ્રેન્ડલી હોળી પ્રગટાવી પર્યાવરણની જાળવણીનો પ્રયાસ કર્યો છે. અને આવનારા વર્ષોમાં પણ આ ટ્રેન્ડ વધશે તો આપણે પર્યાવરણની સો ટકા જાળવણી કરીને શહેરને કુદરતી રીતે સમૃદ્ધ બનાવીશું તેમાં કોઈ બેમત નથી.