દાહોદ તાલુકામાં મોટરસાયકલ ચોર ટોળકીનો તરખાટ : ત્રણ જુદા જુદા સ્થળોએથી ત્રણ મોટરસાઇકલની ચોરી કરી તસ્કરો ફરાર

દાહોદ તા.૦૭

દાહોદ તાલુકામાંથી ત્રણ જુદી જુદી જગ્યાએથી જુદા જુદા સમયગાળા દરમ્યાન ત્રણ મોટરસાઈકલોની ચોરી થતાં વિસ્તારમાં ચકચાર મચી જવા પામી છે.

મોટરસાઈકલ ચોરીનો પ્રથમ બનાવ દાહોદ તાલુકાના દશલા ગામે બનવા પામ્યો હતો જેમાં ગત તા.૧૪મી એપ્રિલના રોજ દશલા ગામે આગલું ફળિયામાં ફળિયામાં રહેતાં સોમાભાઈ પ્રેમચંદભાઈ પરમારે પોતાની મોટરસાઈકલ પોતાના ઘરના આંગણે લોક મારી પાર્ક કરી ગતી. આ મોટરસાઈકલને કોઈ અજાણ્યા ચોર ઈસમોએ પોતાનો કસબ અજમાવી મોટરસાઈકલનું લોક તોડી ચોરી કરી લઈ નાસી જતાં આ સંબંધે સોમાભાઈ પ્રેમચંદબાઈ પરમારે કતવારા પોલીસ મથકે ફરિયાદ નોંધાંવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.

મોટરસાઈકલ ચોરીનો બીજાે બનાવ દાહોદ તાલુકામાંથી પસાર થતાં ઝાલોદ રોડ ખાતે સાંઈ ખુશી સોસાયટી ખાતે બનવા પામ્યો હતો જેમાં ગત તા.૨૬મી માર્ચના રોજ આ વિસ્તારમાં રહેતાં હરેશભાઈ નાગરભાઈ વાઘેલાએ પોતાની મોટરસાઈકલ પોતાના ઘરના આંગણે લોક મારી પાર્ક કરી હતી ત્યારે આ મોટરસાઈકલને કોઈ અજાણ્યા ચોર ઈસમોએ પોતાનો કસબ અજમાવી ચોરી કરી લઈ નાસી જતાં આ સંબંધે હરેશભાઈ નાગરભાઈ વાઘેલાએ દાહોદ તાલુકા પોલીસ મથકે ફરિયાદ નોંધાંવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.

મોટરસાઈકલ ચોરીનો ત્રીજાે બનાવ રળીયાતી ગામે બનવા પામ્યો હતો જેમાં ગત તા.૧૫મી એપ્રિલના રોજ દાહોદ તાલુકાના નાની ખરજ ગામે ભુરીયા ફળિયામાં રહેતાં મેસુલભાઈ ચંદુભાઈ ભુરીયા પોતાના કબજાની મોટરસાઈકલ લઈ રળીયાતી ગામે સાંગા ફળિયામાં કોઈ કામ અર્થે આવ્યાં હતાં અને પોતાની મોટરસાઈકલ આ વિસ્તારમાં લોક મારી પાર્ક કરી ગયાં હતાં ત્યારે કોઈ અજાણ્યા ચોર ઈસમોએ પોતાનો કસબ અજમાવી મોટરસાઈકલની ચોરી કરી લઈ નાસી જતાં આ સંબંધે મેસુલભાઈ ચંદુભાઈ ભુરીયાએ દાહોદ તાલુકા પોલીસ મથકે ફરિયાદ નોંધાંવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.