દાહોદ જિલ્લાના ગરબાડા તાલુકાના ભરસડા ગામે એક મોટરસાઈકલના ચાલકે પાછળથી અન્ય એક મોટરસાઈકલને અડફેટમાં લેતાં મોટરસાઈકલની પાછળ બેઠેલ મહિલાનું મોત નીપજ્યું

રિપોર્ટર : ગગન સોની

દાહોદ તા.૧૧

દાહોદ જિલ્લાના ગરબાડા તાલુકાના ભરસડા ગામે એક મોટરસાઈકલના ચાલકે આગળ જતી અન્ય એક મોટરસાઈકલને પાછળથી ટક્કર મારતાં મોટરસાઈકલ પાછળ બેઠેલ એક મહિલા મોટરસાઈકલ પરથી ફંગોળાઈ જમીન પર પટકાતાં સારવાર દરમ્યાન મહિલાનું મોત નીપજ્યાંનું જાણવા મળે છે.

ગત તા.૧૦મી મેના રોજ ગરબાડા ગામે નવા ફળિયામાં રહેતાં મનોજકુમાર ઉદેસીંગભાઈ રાઠોડ અને તેમની સાથે કાળીબેન એમ બંન્ને જણા એક મોટરસાઈકલ પર સવાર થઈ ભરસડા ગામેથી પસાર થઈ રહ્યાં હતાં તે સમયે પાછળથી આવતી અન્ય એક મોટરસાઈકલના ચાલકે પોતાના કબજાની મોટરસાઈકલ પુરઝડપે અને ગફલત ભરી રીતે હંકારી લાવી મનોજકુમારની મોટરસાઈકલને પાછળથી જાેશભેર ટક્કર મારતાં મનોજભાઈ અને મોટરસાઈકલ પાછળ બેઠેલ કાળીબેને બંન્ને જણા મોટરસાઈકલ પરથી ફંગોળાઈ જમીન પર પટકાયાં હતાં જેને પગલે બંન્ને સારવાર માટે નજીકના દવાખાને ખસેડવામાં આવતાં સારવાર દરમ્યાન કાળીબેનનું મોત નીપજ્યું હતું.

આ સંબંધે ઈજાગ્રસ્ત મનોજકુમાર ઉદેસીંગભાઈ રાઠોડે ગરબાડા પોલીસ મથકે ફરિયાદ નોંધાંવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.