ન્યુ પાર્થ એકલવ્ય તાલીમ વર્ગ સંજેલી ખાતે” વિશ્વ ચકલી દિવસ ” ની ઉજવણી કરવામાં આવી

અજય સાસી

સંજેલી તાલુકામાં આવેલ જય અંબે એજ્યુકેશન ચેરીટેબલ ટ્રસ્ટ સંચાલિત ન્યુ પાર્થ એકલવ્ય તાલીમ વર્ગ સંજેલી શ્રી શ્રધ્ધા વિદ્યાલય ખાતે કાર્યરત છે જેમાં આજુબાજુના ગામોમાંથી ધોરણ ૫ માં અભ્યાસ કરતા વિદ્યાર્થીઓને એકલવ્ય પરીક્ષા, નવોદય પરીક્ષા, સૈનિક પરીક્ષા તેમજ શિષ્યવૃત્તિ પરીક્ષાની સંપૂર્ણ તૈયારી કરાવવામાં આવે છે સાથે સાથે અનાથ, અપંગ અને અતિ ગરીબ વિદ્યાર્થીઓ વિનામૂલ્યે માર્ગદર્શન અને તાલીમ આપવામાં આવે છે. જય અંબે એજ્યુકેશન ચેરીટેબલ ટ્રસ્ટના પ્રમુખશ્રી અને ન્યુ પાર્થ એકલવ્ય તાલીમ વર્ગ સંજેલી – મોરા – સુખસર તાલીમ કેન્દ્રોના સંચાલક શ્રી દિલીપકુમાર એચ. મકવાણા તાલીમ વર્ગમાં તાલીમ મેળવી રહેલા વિદ્યાર્થીઓને વિશ્વ ચકલી દિવસ વિશે સમજ આપવામાં આવી હતી. ચકલીની પ્રજાતિ સમય જતા લુપ્ત થતી જાય છે ત્યારે જેના જોખમને નાથવા અને બચાવ અંગેની લોકજાગૃતિના હેતુ સાથે આ ચકલી દિવસની ઉજવણી કરવામાં આવે છે. ચકલી આપણા ઘરમાં ચી… ચી… કરીને પોતાની હાજરી પુરવાર કરતી હતી. ન્યુ પાર્થ એકલવ્ય તાલીમ વર્ગ મોરાના સંચાલક શ્રી અશ્વિનભાઈ સી. સંગાડા દ્વારા એવું જણાવવામાં આવ્યું હતું કે ચકલીઓ ઘર આગણાંનું નિર્દોષ પંખી લુપ્ત થઈ રહી છે અને ચકલીનો કલરવ સાંભળવો દોયલો બન્યો છે. ચકલી બચાવવા માટે નક્કર કામગીરી કરવી જોઈએ તો વિશ્વ ચકલી દિવસ ની ઉજવણી સાર્થક થાય એવી અપીલ વિદ્યાર્થીઓને કરી હતી સાથે સાથે ચકલી ની વાર્તાઓ દ્વારા અને ચકલીના અવાજ દ્વારા વિદ્યાર્થીઓને સમજ આપવામાં આવી હતી. આમ ન્યુ પાર્થ એકલવ્ય તાલીમ વર્ગ સંજેલી ખાતે વિશ્વ ચકલી દિવસની ઉજવણી કરવામાં આવી હતી.