નડિયાદ પાસે ટ્રેલર ડિવાઈડર સાથે અથડાતા ટ્રેલરની કેબિનમાં આગ લાગતાં ચાલક મોત

નરેશ ગનવાણી નડિયાદ

નડિયાદ પાસે નેશનલ હાઈવે પર પીપલગ નજીકના બુલેટ ટ્રેનના પિલ્લર પાસે સ્ટીલના રોલર ભરેલ ટ્રેલર ડિવાઈડર સાથે અથડાયું હતું. જેથી એકાએક ટ્રેલરની કેબિનમાં આગ લાગતાં ટ્રેલર ચાલક મોત નિપજ્યું. બનાવની જાણ ફાયર બ્રિગેડ અને સ્થાનિક પોલીસને થતાં ઘટનાસ્થળે દોડી આવ્યા હતા.
નડિયાદ નજીકથી અમદાવાદથી વડોદરાને જોડતો નેશનલ હાઇવે નંબર ૪૮ પર પીપલગ એપીએમસી પાસે બુલેટ ટ્રેનના પિલ્લર નજીક આજે બુધવારે વહેલી સવારે એક ગમખ્વાર અક્સ્માત સર્જાયો છે. જેમાં પુરપાટે આવી રહેલ ટ્રેલરના ચાલકે એકાએક પોતાનું વાહન ડિવાઈડર સાથે અથડાવ્યુ હતું. આ ટ્રેલરની પાછળ લોખંડની સાંકળથી સ્ટીલના પ્લેટોના રોલ બાંધેલા હતા જે અકસ્માત બાદ રોલરો એકાએક કેબિન તરફ ધસી આવ્યા હતા. જેમાં અમુક રોલરો કેબિન પર પડતા કેબિનમાં એકાએક આગ લાગી હતી.
ઘટનાની જાણ નડિયાદ ફાયર બ્રિગેડને થતાં તેઓ તાત્કાલિક વોટરબ્રાઉઝર સાથે બનાવ સ્થળે પહોંચી પાણીનો મારો ચલાવી આગને કાબુમાં લીધી હતી. પરંતુ એ પહેલા જ ચાલક બળીને ભડથું થઈ જતા મૃત્યુ પામ્યો હતો. બીજી તરફ ઘટનાની જાણ નડિયાદ ગ્રામ્ય પોલીસને તેમજ નડિયાદ ડિવિઝનના ડિવાયએસપીને થતાં તેઓ પણ ઘટના સ્થળે દોડી આવ્યા હતા જેસીબીની મદદથી ડ્રાઈવરના મૃતદેહને બહાર કાઢી પીએમ અર્થે ખસેડ્યો હતો .તેમજ તેની ઓળખ છતી કરવા પોલીસ કાર્યવાહી હાથ ધરી છે.