દાહોદ જિલ્લામાં ઝાલોદ તાલુકાના કંબોઇ ધામ ખાતે પ્રાંત અધિકારી એ. કે. ભાટિયાએ રવિ કૃષિ મહોત્સવનો શુભારંભ કરાવ્યો
દાહોદ તા.૦૭
ગુજરાતના ખેડૂતોને પ્રવર્તમાન સમયને અનુરૂપ કૃષિ પદ્ધતિઓ અને નવતર અભિગમોથી પરિચિત કરાવવાના શુભ આશયથી સમગ્ર રાજ્યમાં રવિ કૃષિ મહોત્સવનું આયોજન કરવામાં આવ્યું છે. જે અંતર્ગત આજરોજ દાહોદ જિલ્લાના ઝાલોદ તાલુકાના કંબોઇ ધામ ખાતે ઝાલોદ પ્રાંત અધિકારીશ્રી એ. કે. ભાટિયાએ રવિ કૃષિ મહોત્સવનો શુભારંભ કરાવ્યો હતો.
આ પ્રસંગે કૃષિ વૈજ્ઞાનિકશ્રી ડૉ. એન. ટી. મકવાણાએ રવિ પાકો વિશે વૈજ્ઞાનિક પદ્ધતિનું માર્ગદર્શન અને જાણકારી આપી હતી તેમજ પ્રાકૃતિક ખેતી વિશેની જાણકારી ડૉ. કૃષિ વૈજ્ઞાનિકશ્રી બી. જે. સંગાડાએ આપી હતી. ઉપરાંત ઉપસ્થિત રહેલા પ્રાકૃતિક ખેતી અપનાવતા પ્રગતિશીલ ખેડૂતોએ પ્રાકૃતિક ખેતી અપનાવ્યા પછીના પોતાના અનુભવો રજૂ કરીને તમામ ખેડૂતોને પ્રાકૃતિક ખેતી પદ્ધતિ અપનાવવા માટે અનુરોધ કર્યો હતો.
આ પ્રસંગે ઝાલોદ પ્રાંત અધિકારીશ્રી એ. કે. ભાટિયા તેમજ ઉપસ્થિત અન્ય મહાનુભાવોના હસ્તે કૃષિ અને પશુપાલન વિભાગની વિવિધ સહાય યોજનાઓના લાભાર્થીઓને મંજૂરી સહાય હુકમોના વિતરણ કરવામાં આવ્યા હતા, તેમજ કૃષિ મહોત્સવ સ્થળે પ્રદર્શન અર્થે રાખવામાં આવેલ વિવિધ વિભાગના સ્ટોલોની મુલાકાત લીધી હતી.
આ પ્રસંગે તાલુકા પંચાયત ઉપપ્રમુખસુશ્રી નિશાબેન નિનામા સહિત અન્ય મહાનુભાવો તેમજ મામલતદારશ્રી એસ. એમ. પરમાર, ઝાલોદ તાલુકા વિકાસ અધિકારીશ્રી કલ્પેશ ગઢવી, ઝાલોદ મદદનીશ પશુપાલન નિયામકશ્રી ડી. એસ. મેવાતિયા, ખેતી અધિકારીશ્રી, પશુ ચિકિત્સક અધિકારીશ્રી સહિત મોટી સંખ્યામાં ખેડૂતો ઉપસ્થિત રહ્યા હતા.
