ઝાલોદના ગરાડુ ગામે મોટરસાયકલ સ્લીપ ખાઈ જતા એક મહિલા સહિત બેના મોત નીપજ્યા

દાહોદ તા.૧૭

દાહોદ જિલ્લામાં માર્ગ અકસ્માતોની વણઝાર સતત ચાલુ છે. વાહન ચાલકોની ગફલતના કારણે જિલ્લામાં નિર્દાેષ લોકો પોતાનો જીવ ગુમાવી રહ્યાં છે ત્યારે ઝાલોદ તાલુકાના ગરાડુ ગામે વધુ એક માર્ગ અકસ્માતમાં એક મહિલા સહિત બે વ્યક્તિઓએ પોતાનો જીવ ગુમાવ્યો છે. જ્યારે એક ઈજાગ્રસ્ત મહિલાને સારવાર માટે નજીકના દવાખાને લઈ જવામાં આવી હોવાનું જાણવા મળે છે.

ઝાલોદના ગરાડુ ગામે સુખસર ત્રણ રસ્તા ઉપર ગત તા.૧૫મી જાન્યુઆરીના રોજ ફતેપુરાના વટલી ગામે સંગાડા ફળિયામાં રહેતાં ભાવદિપભાઈ જયંતિભાઈ નિનામા પોતાના કબજાની મોટરસાઈકલ પર પાછળ યુક્તિબેન તથા સીમાબેનને બેસાડી ઝાલોદના ગરાડુ ગામે સુખસર ત્રણ રસ્તા પરથી પોતાના કબજાની મોટરસાઈકલ પુરઝડપે અને ગફલત ભરી રીતે હંકારી પસાર થઈ રહ્યાં હતાં ત્યારે મોટરસાઈકલની વધુ પડતી ઝડપના કારણે મોટરસાઈકલ સ્લીપ ખાઈ ગઈ હતી અને રસ્તાની બાજુમાં આવેલ બાવળાના ઝાડ સાથે મોટરસાઈકલ ધડાકાભેર અથડાતા મોટરસાઈકલના ચાલક ભાવદિપભાઈ તથા પાછળ બેઠેલ બંન્ને મહિલાઓ યુક્તિબેન અને સીમાબેન એમ ત્રણેય મોટરસાઈકલ પરથી ફંગોળાઈ જમીન પર પટકાયાં હતાં જેને પગલે ભાવદિપભાઈ તથા યુક્તિબેનને શરીરે, હાથે પગે તેમજ માથાના ભાગે ગંભીર જીવલેણ ઈજાઓ પહોંચતાં બંન્નેનું મોત નીપજ્યું હતું જ્યારે સીમાબેનને શરીરે ઈજાઓ પહોંચતાં તેઓને તાત્કાલિક નજીકના દવાખાને સારવાર માટે લઈ જવામાં આવ્યાં હતાં.

આ સંબંધે મિતભાઈ જયંતિભાઈ નિનામાએ ઝાલોદ પોલીસ મથકે ફરિયાદ નોંધાંવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.