દેવગઢ બારીઆ પાલિકાની હેલ્પલાઇનથી 99% ફરિયાદોનો નિકાલ : 40 દિવસમાં 179 ફરિયાદોમાંથી મોટાભાગની સમસ્યાઓનું સમાધાન, નગરજનોમાં ખુશી
દાહોદ તા.૨૦
દેવગઢ બારીઆ નગરપાલિકાએ નગરજનોની સમસ્યાઓના નિરાકરણ માટે શરૂ કરેલી હેલ્પલાઇને ઉત્કૃષ્ટ કામગીરી કરી છે. નગરપાલિકા પ્રમુખ ધર્મેશભાઈ કલાલના નેતૃત્વમાં 9 માર્ચથી શરૂ થયેલી આ સેવામાં 18 એપ્રિલ સુધીમાં 179 ફરિયાદો નોંધાઈ હતી. તેમાંથી 99% ફરિયાદોનો સફળતાપૂર્વક નિકાલ કરવામાં આવ્યો છે. હેલ્પલાઇન દ્વારા નગરજનોને નગરપાલિકા સુધી રૂબરૂ જવાની જરૂર પડતી નથી. દરેક ફરિયાદની વિગતો પારદર્શી રીતે નોંધવામાં આવે છે. સ્થાનિક રહેવાસી રમેશભાઈએ પાણીની સમસ્યાના ઝડપી નિરાકરણની પ્રશંસા કરી હતી. હાલમાં કેટલીક ફરિયાદો સરકારી મંજૂરીની રાહ જોઈ રહી છે. તેમાં ગટર ઢાંકણો, નાળા સફાઈ, નવી પાઈપલાઈન અને સ્ટ્રીટ લાઈટની વ્યવસ્થાનો સમાવેશ થાય છે. નગરપાલિકાએ આ માટે પ્રસ્તાવ મોકલ્યા છે. પારદર્શિતા જાળવવા માટે નગરપાલિકા દર મહિને ફરિયાદોની વિગતો સાથેની PDF ફાઈલ જાહેર કરશે.
પ્રમુખ ધર્મેશભાઈ કલાલે નગરજનોની સુવિધાને પ્રાથમિકતા ગણાવી છે. ભવિષ્યમાં નગરપાલિકા ડિજિટલ પ્લેટફોર્મ અને નાગરિક સુવિધા કેન્દ્રો શરૂ કરવાની યોજના ધરાવે છે. આ પહેલે દેવગઢ બારીઆને વધુ સુવિધાયુક્ત બનાવવાની દિશામાં મહત્વનું પગલું બન્યું છે.
