વાહન ચાલકોની ગફલતના કારણે દાહોદ જિલ્લામાં સર્જાયેલ માર્ગ અકસ્માતના બે બનાવોમાં બે જણાના મોત નીપજ્યાં

દાહોદ તા.૩૦

દાહોદ જિલ્લામાં વાહન ચાલકોની ગફલતના કારણે સર્જાયેલ માર્ગ અકસ્માતના બે બનાવોમાં બે જણાના મોત નીપજતાં પરિવારમાં માતમ છવાઈ ગયો હતો. બંન્ને બનાવ સંદર્ભે જે તે પોલીસ મથકે ફરિયાદ નોંધાતાં પોલીસે તપાસ હાથ ધરી છે.

માર્ગ અકસ્માતનો પ્રથમ બનાવ ઝાલોદ તાલુકાના લીમડી નગરના ગોધરા રોડ ખાતે બનવા પામ્યો હતો જેમાં ગત તા.૨૯મી મેના રોજ એક ટ્રેક્ટરના ચાલકે પોતાના કબજાનું ટ્રેક્ટર પુરઝડપે અને ગફલત ભરી રીતે હંકારી લાવી તે સમયે ત્યાંથી મોટરસાઈકલ લઈ પસાર થઈ રહેલા ઝાલોદ તાલુકાના કચુંબર ગામે વડલી ફળિયામાં રહેતા રમેશભાઈની મોટરસાઈકલને અડફેટમાં લઈ જાેશભેર ટક્કર મારતાં રમેશભાઈ મોટરસાઈકલ સાથે જમીન પર ફંગોળાયાં હતાં જેને પગલે તેઓને શરીરે તેમજ માથાના ભાગે ગંભીર જીવલેણ ઈજાઓ થતાં તેઓનું મોત નીપજ્યું હતું. આ સંબંધે કચુંબર ગામે વડલી ફળિયામાં રહેતાં નાથુભાઈ રૂપલાભાઈ પરમારે લીમડી પોલીસ મથકે ફરિયાદ નોંધાવતાં પોલીસે ગુનો નોંધી આગળની તપાસ હાથ ધરી છે.

માર્ગ અકસ્માતનો બીજાે બનાવ ગરબાડા તાલુકાના દાદુર ગામે બનવા પામ્યો હતો જેમાં ગત તા.૨૮મી મેના રોજ ગરબાડા તાલુકાના ગુંગરડી ગામે હોળી ફળિયામાં રહેતાં શકરાભાઈ ઝીથરાભાઈ ભાભોરે પોતાના કબજાની મોટરસાઈકલ પર વાઘજીભાઈ અને બાબુભાઈ મંગળાભાઈ ભાભોરને બેસાડી ત્રણેય જણા એક મોટરસાઈકલ પર સવાર થઈ પસાર થઈ રહ્યાં હતાં. આ દરમ્યાન શકરાભાઈએ પોતાના કબજાની મોટરસાઈકલ પુરઝડપે અને ગફલત ભરી રીતે હંકારી લાવી મોટરસાઈકલ પરના સ્ટેરીંગ પરનો કાબુ ગુમાવી દેતાં મોટરસાઈકલ સ્લીપ ખાઈ ગઈ હતી અને જેને પગલે ત્રણેય જણાને શરીરે ઈજાઓ પહોંચી હતી પરંતુ બાબુભાઈ મંગળાભાઈ ભાભોરને શરીરે તથા માથાના ભાગે ગંભીર જીવલેણ ઈજાઓ થતાં તેઓનું સારવાર દરમ્યાન મોત નીપજતાં આ સંબંધે ગુંગરડી ગામે હોળી ફળિયામાં રહેતાં રાહુલભાઈ બાબુભાઈ ભાભોરે ગરબાડા પોલીસ મથકે ફરિયાદ નોંધાવતાં પોલીસે ગુનો નોંધી કાયદેસરની કાર્યવાહી હાથ ધરી છે.