દાહોદ જિલ્લા ઝાલોદ તાલુકાના ચાકલીયા ગામે ૨૫ વર્ષીય યુવકની તાબા હેઠળની મોટરસાઈકલ સ્લીપ ખાઈ જતાં પાછળ બેઠેલ યુવકની માતા, ભાઈ અને એક બાળકીને ઈજા : યુવકનું ગંભીર ઈજાઓને પગલે સારવાર દરમ્યાન મોત
રિપોર્ટર : ગગન સોની
દાહોદ તા.૦૬
દાહોદ જિલ્લાના ઝાલોદ તાલુકાના ચાકલીયા ગામે એક ૨૫ વર્ષીય યુવક પોતાના કબજાની મોટરસાઈકલ પર પોતાની માતા, ભાભી અને એક બાળકીને બેસાડી પુરઝડપે અને ગફલત ભરી રીતે હંકારી પસાર થતાં અચાનક મોટરસાઈકલ પરના સ્ટેરીંગ પરનો કાબુ ગુમાવી બેસતાં મોટરસાઈકલ સ્લીપ ખાઈ ગઈ હતી અને જેને પગલે યુવકની માતા, ભાભી અને તેની સાથેની એક બાળકીને શરીરે ઓછી વત્તી ઈજાઓ પહોંચતી હતી જ્યારે ૨૫ વર્ષીય મોટરસાઈકલના ચાલક યુવકને શરીરે ગંભીર જીવલેણ ઈજાઓ પહોંચતાં તેનું સારવાર દરમ્યાન મોત નીપજ્યાંનું જાણવા મળે છે.
ગત તા.૦૨જી ઓગષ્ટના રોજ દાહોદ તાલુકાના રાણાપુરખુર્દ ગામે કુવા ફળિયામાં રહેતાં ૨૫ વર્ષીય અનીલભાઈ વરસીંગભાઈ પારગી પોતાના કબજાની મોટરસાઈકલ પર પોતાની માતા, ભાભી અને એક બાળકીને બેસાડી ઝાલોદ તાલુકાના ચાકલીયા ગામેથી પસાર થઈ રહ્યાં હતાં. આ દરમ્યાન મોટરસાઈકલના ચાલક અનીલભાઈ દ્વારા પોતાના કબજાની મોટરસાઈકલ પુરઝડપે અને ગફલત ભરી રીતે હંકારી લાવતાં અચાનક મોટરસાઈકલ પરના સ્ટેરીંગ પરનો કાબુ ગુમાવી બેસતાં તમામ જમીન પર ફંગોળાયાં હતાં જેને પગલે તમામને શરીરે ઈજાઓ પહોંચતાં નજીકના દવાખાને સારવાર અર્થે ખસેડવામાં આવ્યાં હતાં. સારવાર દરમ્યાન અનીલભાઈ વરસીંગભાઈ પારગીને શરીરે તેમજ માથાના ભાગે ગંભીર જીવલેણ ઈજાઓ પહોંચતાં તેઓનું સારવાર દરમ્યાન મોત નીપજ્યું હતું જ્યારે તેમના માતા, ભાભી અને બાળકીને શરીરે ઓછી વત્તી ઈજાઓ પહોંચતાં તેઓ સારવાર હેઠળ હોવાનું જાણવા મળી રહ્યું છે.
આ સંબંધે દાહોદ તાલુકાના રાણાપુરખુર્દ ગામે કુવા ફળિયામાં રહેતાં રોહિતભાઈ વરસીંગભાઈ પારગીએ ચાકલીયા પોલીસ મથકે ફરિયાદ નોંધાવતાં પોલીસે ગુનો નોંધી આગળની તપાસ હાથ ધરી છે.
