દાહોદ શહેર સહિત જિલ્લામાં મેઘરાજા મહેરબાન : સૌથી વધુ દાહોદ તાલુકામાં ૩૧ મીમી વરસાદ ખાબક્યો
રિપોર્ટર : ગગન સોની
દાહોદ તા.૧૧
દાહોદ શહેર સહિત જિલ્લામાં વહેલી સવારથી જ મેઘરાજા મન મુકીને વરસ્યા હતાં. જિલ્લામાં સર્વત્ર વાતાવરણમાં ઠંકડ પ્રસરી જવા પામી છે. જાહેર રસ્તા ઉપર વરસાદી પાણી છવાઈ ગયાં છે. શ્રાવણ માસ દરમ્યાન મેઘરાજા રિસાયા હોય તેમ હવે ભાદરવાના આગમન સાથે ભાદરવો ભરપુર રહેશે તેવું લાગી રહ્યું છે. સવારના ૧૦ વાગ્યા સુધીમાં દાહોદ તાલુકામાં ૩૧ મીમી અને જિલ્લામાં કુલ ૧૧૬ મીમી વરસાદ ખાબક્યો છે.
મોડી રાત્રીના સમયે વીજળીના કડાકા ધડાકા સાથે વરસાદે દાહોદ શહેર સહિત જિલ્લામાં પુનઃ આગમન કર્યું હતું. વહેલી સવારે પણ સારો એવો વરસાદ પડતો હતો. વાતાવરણમાં ઠંડક પ્રસરી જવા પામી છે. જાહેર રસ્તાઓ ઉપર વરસાદી પાણી ફરી વળ્યાં હતા. ખાસ કરીને નીચાણવાળા વિસ્તારોમાં પણ વરસાદી પાણીનો જમાવડો જાેવા મળ્યો હતો તો બીજી તરફ આર્શિવાદરૂપ આ વરસાદને પગલે ધરતીપુત્રોમાં પણ આનંદની લાગણી વ્યાપી જવા પામી છે. સવારથી બપોર બાદ પણ દાહોદ શહેર સહિત જિલ્લામાં વાદળછાયું વાતાવરણ રહ્યું હતં અને અમી છાંટા વચ્ચે વાતાવરણ વરસાદી માહોલ વચ્ચે ઢંકાયેલો હતો. દાહોદમાં ગણપતિ દાદાના આગમન સાથે મેઘરાજાએ ધમાકેદાર એન્ટ્રી કરી છે જાણે વરસાદના સ્વાગત સાથે ગણપતિ દાદા પધાર્યા હોય તેમ લાગતું હતું.
સવારના ૦૬ થી ૧૦ વાગ્યા સુધીના વરસાદના આંકડા
ગરબાડામાં ૨૦ મીમી
ઝાલોદ ૦૦ મીમી
દેવગઢ બારીઆ ૩૦ મીમી
દાહોદ ૩૧ મીમી
દાનપુર ૨૦ મીમી
ફતેપુરા ૦૭ મીમી
લીમખેડા ૧૪ મીમી
સંજેલવી ૦૦ મીમી
સીંગવડ ૦૪ મીમી
કુલ ઃ ૧૧૬ મીમી.
