ડોન્ટ વરી ! દાહોદ નગરની હવા છે પ્રદૂષણ મુક્ત, એર ક્વોલિટી ઇન્ડેક્સ સતત ૧૦૦ની નીચે

દાહોદ તા.૦૮
સ્વચ્છ હવા સ્વાસ્થ્ય માટે અતિ જરૂરી છે. પ્રદૂષણમુક્ત વાતાવરણ તમારા તન અને મનને તરબતર કરી મૂકે છે. પણ, જો તમે દાહોદ નગરમાં વસતા હો તો હવાના પ્રદૂષણની કોઇ ચિંતા કરવાની જરૂર નથી. કારણ કે, એ વાત સાબીત થઇ ચૂકી છે કે દાહોદ નગરની હવામાં બિલ્કુલ પ્રદૂષણ નથી. સ્માર્ટ સિટી બનવા જઇ રહેલા દાહોદમાં લગાવવામાં આવેલા સ્માર્ટ પોલમાંથી મળેલા ડાટા દર્શાવે છે કે, એર ક્વોલિટી ઇન્ડેક્ટ સરેરાશ ૧૦૦થી નીચે રહે છે. એટલે કે, દાહોદ નગરની હવા એકદમ સ્વચ્છ છે.
ઉક્ત વાત સમજતા પૂર્વે સ્વચ્છ હવા અંગે થોડી સમજણ મેળવી લઇએ. પ્રદૂષિત હવામાં રજકણો ઉપરાંત, નાઇટ્રોઝન ડાયોક્સાઇડ, સલ્ફર ડાયોક્સાઇડ અને કાર્બન ડાયોક્સાઇડ જેવા સ્વાસ્થ્ય માટે હાનીકારક ગેસ હોય છે. આ ગેસ વાહનના ધૂમાડા, ઉદ્યોગોમાંથી નીકળી હવામાં ભળે છે.
બીજી વાત ! ઉક્ત ગેસનું પ્રમાણ હવામાં કેટલીક માત્રાથી વધે તો હાનીકારક છે. આ માટે કેન્દ્ર સરકારના વન અને પર્યાવરણ વિભાગ દ્વારા નેશનલ એમ્બિયન્સ એર ક્વોલિટી સ્ટાન્ડર્ડ નિયત કરવામાં આવ્યા છે. જેમાં કેન્દ્ર સરકાર દ્વારા જાહેર કરવામાં આવ્યું છે કે, હવામાં કેટલાક ગેસનું નિયત માત્રાથી પ્રમાણ વધે તો નુકસાનકારક સાબીત થઇ શકે છે.
હવે વાત દાહોદની ! દાહોદ નગરમાં વિવિધ ૨૨ સ્થળે સ્માર્ટ પોલ લગાવવામાં આવ્યા છે. જેમાં હવાના પ્રદૂષણનું પણ મોનિટરિંગ કરવામાં આવે છે. આ સ્માર્ટ પોલ થકી પ્રાપ્ત થયેલા આંકડા દર્શાવે છે કે, દાહોદ નગરની હવામાં હાનીકારક ગેસની માત્ર સાવ નગણ્ય છે.
આ આંકડા જોઇએ તો દાહોદ નગરમાં એર ક્વોલિટી ઇન્ડેક્સ સરેરાશ ૧૦૦થી નીચે રહે છે. વળી, દાહોદની હવામાં પીએમ (પર્ટીક્યુલેટ મેટર) ૨.૫ પ્રકારના રજકણોનું પ્રમાણ વધારે છે. આ રજકણોની સાઇઝને સરળ ભાષામાં સમજીએ તો માથાના વાળની જાડાઇ કરતા પણ ૨.૫ ગણા નાના રજકણો ! આવા રજકણોનું પ્રમાણ સરેરાશ ૬૦ મિલિગ્રામ પ્રતિ ક્યુબિક મિટરથી નીચે છે. નેશનલ એમ્બિયન્સ એર ક્વોલિટી સ્ટાન્ડર્ડ મુજબ આ પ્રમાણ ૬૦ મિલિગ્રામ પ્રતિ ક્યુબિક મિટર નિયત કરવામાં આવ્યું છે. જ્યારે, એનાથી પણ નાના રજકણોને પીએમ૧૦નું પ્રમાણ સરેરાશ ૭૫ મિલિગ્રામ પ્રતિ ક્યુબિક મિટરથી નીચે છે. આ માટે નિયત માત્ર ૧૦૦ છે.
હવે દાહોદ નગરની હવામાં હાનીકારક ગેસનું પ્રમાણ જોઇએ ! નાઇટ્રોઝન ગેસનું પ્રમાણ તેની નિયત માત્રા ૮૦ કરતા સાવ ઓછું એટલે કે, એકંદરે ૨૫થી નીચે રહે છે. તેવી જ રીતે સલ્ફર ડાયોક્સાઇડની હવામાં પ્રમાણ ૮૦ મિલિગ્રામ પ્રતિ ક્યુબિક મિટર છે. જેની સામે આ ગેસ દાહોદમાં બે થી પણ નીચે રહે છે. જ્યારે, કાર્બન મોનોક્સાઇડની માત્ર ૪ નિયત કરવામાં આવી છે. તેની સાપેક્ષે દાહોદમાં આ હાનીકારક ગેસ માત્ર ૦.૫૦ મિલિગ્રામ પ્રતિ ક્યુબિક મિટર રહે છે. આ માત્રા સાવ નગણ્ય છે.
સ્માર્ટ પોલનો સાપ્તાહિક રિપોર્ટ પર એક નજર નાંખવામાં આવે તો માલૂમ પડે છે કે, દાહોદમાં હવાના પ્રદૂષણમાં પીએમ ૨.૫ પ્રકારના રજકણોનું કારણ મુખ્યત્વે છે. જો કે, આપણા નાકની કુદરતી સંરચના જ આ પ્રદૂષણ સામે રક્ષણ આપે છે.