દાહોદના ખંગેલા ચેકપોસ્ટ પરથી પોલીસે એક આઇસર ગાડીમાંથી રૂપિયા ૯.૭૦ લાખ ઉપરાંતનો વિદેશી દારૂ ઝડપી પાડ્યો

દાહોદ તા.૨૪

દાહોદ તાલુકાના ખંગેલા ચેકપોસ્ટ પર પોલીસની નાકાબંધી દરમ્યાન પોલીસે એક આઈસર ગાડીમાંથી બીયરનો કુલ રૂા.૯,૭૦,૩૨૦ના જથ્થા સાથે આઈસર ગાડીની કિંમત મળી પોલીસે કુલ રૂા.૨૯,૭૬,૩૨૦ના મુદ્દામાલ સાથે ગાડીના ચાલક સહિત બે ઈસમોની અટકાયત કરી હોવાનું જાણવા મળે છે. ગત તા.૨૩મી જાન્યુઆરીના રોજ પોલીસને મળેલ બાતમીના આધારે દાહોદના ખંગેલા ચેકપોસ્ટ પર નાકાબંધી કરી આવતાં જતાં તમામ નાના મોટા વાહનોની તલાસી હાથ ધરતાં હતાં તે સમયે બાતમીમાં દર્શાવેલ એક આઈસર ગાડી ત્યાંથી પસાર થતાં પોલીસ સાબદી બની હતી અને ગાડીમાં સવાર રોશનભાઈ સત્યનારાયણ મિણા અને બંટીભાઈ આશારામ બામણીયા (બંન્ને રહે.મધ્યપ્રદેશ) નાઓની પુછપરછ કરતાં પોલીસને સંતોષકારક જવાબ મળ્યો ન હતો જેથી પોલીસે આઈસર ગાડીની તલાસી લેતાં તેમાંથી પોલીસે બીયરની પેટીઓ નંગ.૩૧૧ જેમાં બોટલો નંગ.૭૪૬૪ જેની કિંમત રૂપીયા ૯,૭૦,૩૨૦ના પ્રોહી જથ્થા સાથે આઈસર ગાડીની કિંમત મળી પોલીસે કુલ રૂપીયા૨૯,૭૬,૩૨૦નો મુદ્દામાલ કબજે કરી ઉપરોક્ત બંન્ને ઝઢપાયેલ ઈસમોની પુછપરછ કરતાં આ પ્રોહીનો જથ્થો સચીન જૈશવાલ, વિજયભાઈ ઠાકુર તથા અમદાવાદના એક ઈસમ સાથે મળી હેરાફેરી કરતાં હોવાની કબુલાત કરતાં આ સંબંધે કતવારા પોલીસે પ્રોહીબીશનનો ગુનો નોંધી આગળની કાયદેસરની કાર્યવાહી હાથ ધરી છે.