નડિયાદમાં પર્યુષણ પર્વની ભવ્ય ઉજવણી, મહાવીર જન્મ કલ્યાણકનો ઉત્સાહ

નરેશ ગનવાણી નડિયાદ

હાલમાં ચાલી રહેલા પર્યુષણ પર્વના પવિત્ર માહોલમાં નડિયાદ શહેર સંપૂર્ણપણે ધાર્મિક રંગે રંગાયું છે. પર્વના પાંચમા દિવસે જૈન ધર્મના ૨૪મા તીર્થંકર ભગવાન મહાવીરના જન્મ કલ્યાણકની ભક્તિપૂર્વક ઉજવણી કરવામાં આવી, જેમાં શહેરના જૈન સમાજે ઉત્સાહભેર ભાગ લીધો. આ અવસરે જૈન દેરાસરોમાં વિશેષ પૂજા-અર્ચના, પ્રવચનો અને ભક્તિ સંગીતના કાર્યક્રમોનું આયોજન થયું હતું.
આ પાવન પ્રસંગે જૈન સંઘ દ્વારા સવારથી જ ઉજવણીનો પ્રારંભ થયો હતો. દેરાસરોને આકર્ષક રોશની અને ફૂલોથી સજાવવામાં આવ્યા હતા, જેના કારણે સમગ્ર વાતાવરણ દિવ્ય બન્યું હતું. ભગવાન મહાવીર સ્વામીના પારણાનો વરઘોડો શહેરના મુખ્ય માર્ગો પર ફેરવવામાં આવ્યો હતો, જેમાં મોટી સંખ્યામાં શ્રાવક-શ્રાવિકાઓ જોડાયા હતા. આ ઉપરાંત, ભગવાનની વિશેષ સ્નાત્ર પૂજા અને અષ્ટપ્રકારી પૂજન પણ કરવામાં આવ્યા હતા. આ પર્વ નિમિત્તે, જૈન મુનિ સુભાષિતજી મહારાજ સાહેબ અને નંદાવ્રત મહારાજ સાહેબ સહિત સાધ્વીજીઓના પ્રવચનોનું પણ આયોજન થયું હતું. તેમણે ભગવાન મહાવીરના જીવન, ઉપદેશો, અને તેમણે આપેલા અહિંસા, સદાચાર, અને ત્યાગના માર્ગનું પાલન કરવા પર ભાર મૂક્યો હતો.
પર્વની ઉજવણીના ભાગરૂપે વિવિધ મંડળો દ્વારા સાંસ્કૃતિક કાર્યક્રમો, ભક્તિ સંગીત, અને સાધર્મિક ભક્તિનું પણ આયોજન કરવામાં આવ્યું. સમગ્ર શહેરમાં પર્યુષણ પર્વના કારણે ધાર્મિક અને શાંતિપૂર્ણ વાતાવરણ છવાયું છે, જ્યાં લોકો એકબીજાને ક્ષમાના સંદેશ સાથે પર્વની શુભેચ્છાઓ પાઠવી રહ્યા છે.
પર્વનું સમાપન બુધવારે સંવત્સરી પર્વ સાથે થશે. આ દિવસે જૈન ધર્મના શ્રદ્ધાળુઓ એકબીજાને ‘મિચ્છામિ દુક્કડમ્’ કહીને એક વર્ષ દરમિયાન થયેલી ભૂલો માટે ક્ષમા યાચના કરશે.