દાહોદ શહેરના પરેલ વિસ્તારમાં જુગાર રમતાં બે ઈસમોને પોલીસે ઝડપી પાડ્યાં : રૂા.૩૦,૫૬૦નો મુદ્દામાલ કબજે કરવામાં આવ્યો

રિપોર્ટર : ગગન સોની

દાહોદ તા.૧૨

દાહોદ શહેરના પરેલ વિસ્તાર ખાતે વરલી, મટકાનો આંક ફરકનો પૈસા વડે જુગાર રમી રહેલા બે ઈસમોને પોલીસે ઝડપી પાડી તેઓની પાસેથી રોકડા રૂપીયા ૨૫,૫૬૦ વિગેરે મળી કુલ રૂા. ૩૦,૫૬૦નો મુદ્દામાલ કબજે કર્યાંનું જાણવા મળે છે.

ગત તા. ૧૧મી ફેબ્રુઆરીના રોજ જગદીશચંદ્ર ઘીસાલાલ અગ્રવાલ અને ગણપતભાઈ નાવી (બંન્ને રહે. ઝાલોદ, તા. ઝાલોદ, જિ.દાહોદ) નાઓએ દાહોદ શહેરના પરેલ પાંચ રસ્તા ખાતે જાહેરમાં વરલી, મટકાનો આંક ફરકનો પૈસા વડે જુગાર રમી રહ્યાં હતાં. આ અંગેની બાતમી દાહોદ શહેર પોલીસને મળતાં પોલીસે ઓંચિતી રેડ કરતાં પોલીસે ઉપરોક્ત બંન્ને ઈસમોને ઝડપી પાડ્યાં હતાં. પોલીસે રોકડા રૂપીયા ૨૫,૫૬૦, બે મોબાઈલ ફોન, જુગારના સાધનો મળી કુલ રૂા. ૩૦,૫૬૦નો મુદ્દામાલ કબજે કરી ઉપરોક્ત બંન્ને ઈસમો વિરૂધ્ધ દાહોદ શહેર પોલીસે જુગાર ધારા હેઠળ ગુનો નોંધી આગળની કાયદેસરની કાર્યવાહી હાથ ધરી છે.