દાહોદ જિલ્લામાં બે વાહન ચોરીના બનાવોમાં બે મોટરસાઈકલ મળી ત્રણ વાહનોની ઉઠાંતરી કરી જતાં અજાણી વાહન ચોર ટોળકી

દાહોદ તા.૧૫
દાહોદ જિલ્લામાં બે જુદી જુદી જગ્યાએથી બે મોટરસાઈકલ સાથે એક ફોર વ્હીલર મળી કુલ ત્રણ વાહનોની ઉઠાંતરી થતાં વાહન ચાલકોમાં ફફડાટ સાથે મોટરસાઈકલ ચોરો સામે રોષની લાગણી ભભુકી ઉઠવા પામી છે.
મોટરસાઈકલ ચોરીનો પ્રથમ બનાવ ગરબાડા ચોકડીની શાક માર્કેટની અંદર બનવા પામ્યો હતો જેમાં દાહોદ તાલુકાના કતવારા ગામે વાડી ફળિયામાં રહેતા પ્રવિણભાઈ નવલસિંગભાઈ મોહનીયા તથા મનુભાઈએ પોતાની મોટરસાઈકલને વહેલી સવારના ૬ થી ૭ વાગ્યાના સમયગાળા દરમ્યાન શાક માર્કેટમાં પોતાની મોટરસાઈકલ લોક મારી પાર્ક કરી હતી. આ મોટરસાઈકલને કોઈ અજાણ્યા ચોર ઈસમોએ મોટરસાઈકલનું લોક તોડી ચોરી કરી લઈ જતા આ સંબંધે પ્રવિણભાઈ નવલસિંગભાઈ મોહનીયાએ દાહોદ શહેર પોલિસ મથકે ફરિયાદ નોંધાવતા પોલિસે ગુનો નોંધી તપાસ હાથ ધરી છે.
વાહન ચોરીનો બીજા બનાવ દાહોદ જિલ્લાના સંજેલી નગરમાં બનવા પામ્યો હતો જેમાં મહીસાગર જિલ્લાના લુણાવાડા તાલુકાના ભેસાવાડા ગામે વાદી ફળિયામાં રહેતા બાબુભાઈ મોતીભાઈ વાદીએ પોતાની મહીન્દ્રા કંપનીની જીવો લોડીંગ ગાડી સંજેલી હાટ બજારમાં લોક મારી પાર્ક કરી ગયા હતા. આ ગાડીને કોઈ અજાણ્યા ઈસમોએ પોતાનો કસબ અજમાવી લોક તોડી ચોરી કરી લઈ જતાં આ સંબંધે બાબુભાઈ મોતીભાઈ વાદીએ સંજેલી પોલિસ મથકે ફરિયાદ નોંધાવતા પોલિસે ગુનો નોંધી તપાસ હાથ ધરી છે.