લીમખેડા કંબોઈ ગામે મોડી રાત્રે હિટ એન્ડ રનના બનાવના પગલે ચકચાર મચી : રાત્રિના અઢી વાગ્યા ના સમયગાળા દરમિયાન ઘરની બહાર મીઠી નીંદર માણી રહેલ દંપતિ ઉપર ટ્રેકટર ફરી વળ્યુ : દંપતીનું કરુણ મોત

દાહોદ તા.૧૪

દાહોદ જિલ્લાના લીમખેડા તાલુકાના કંબોઈ ગામે મધ્યરાત્રીના અઢી વાગ્યાના આસપાસ એક ટ્રેક્ટરના ચાલકે પોતાના કબજાનું ટ્રેક્ટર પુરઝડપે હંકારી લાવી તે સમયે ઘરની બહાર ખુલ્લામાં મીઠી નિંદર માણી રહેલા એક દંપતિને આ ટ્રેક્ટરના ચાલકે અડફેટમાં લેતાં પતિ-પત્નિ બંન્નેના મોત નીપજતાં મધ્યરાત્રીની બનેલ આ ઘટનાને પગલે વિસ્તારમાં ચકચાર મચી જવા પામી હતી. આ માર્ગ અકસ્માતનો અવાજ સંભળાતાની સાથે આસપાસના લોકો દોડી આવ્યાં હતાં.

લીમખેડાના કંબોઈ ગામે રહેતાં ૪૧ વર્ષિય મનહરભાઈ રામસિંહ પરમાર તથા તેમની ૪૦ વર્ષિય પત્નિ ગીતાબેન મનહરભાઈ પરમાર આ બંન્ને પતિ-પત્નિ ગત તા.૧૩મી જુનના રોજ રાત્રીના સમયે જમી પરવારી પોતાના ઘરની બહાર ખુલ્લામાં મીઠી નિંદર માણી રહ્યાં હતાં. આ વેળાએ ત્યાંથી એક ટ્રેક્ટર પસાર થયું હતું અને ટ્રેક્ટરના ચાલકે પોતાના કબજાનું ટ્રેક્ટર પુરઝડપે અને ગફલત ભરી રીતે હંકારી લાવતો હતો ત્યારે વળાંકમાં ટ્રેક્ટરના ચાલકે પોતાના કબજાનું ટ્રેક્ટર પુરઝડપે અને ગફલત ભરી રીતે હંકારી લાવતાં ટ્રેક્ટરના ચાલકે અચાનક ટ્રેક્ટર પરના સ્ટેરીંગ પરનો કાબુ ગુમાવી દઈ ખુલ્લામાં મીઠી નિંદર માણી રહેલા દંપતિને અડફેટમાં લેતાં મનહરભાઈનું ઘટના સ્થળ પર કમકમાટી ભર્યુ મોત નીપજ્યું હતું. આ ઘટનાને પગલે આસપાસના લોકો દોડી આવ્યાં હતાં ત્યારે ગંભીર ઈજાગ્રસ્ત ગીતાબેનને નજીકના દવાખાને તાત્કાલિક સારવાર માટે લઈ જવામાં આવતાં ગીતાબેનને સારવાર મળે તે પહેલા તેમનું પણ મોત નીપજ્યું હતું. આ ઘટનાને પગલે પંથકમાં મધ્યરાત્રીના સમયે ચકચાર સાથે ખળભળાટ મચી જવા પામ્યો હતો. દંપતિના મોતને પગલે પરિવારજનોમાં ગમગીની છવાઈ ગઈ હતી. આ ઘટના અંગેની જાણ સ્થાનીક પોલીસને કરવામાં આવતાં પોલીસ કાફલો પણ ઘટના સ્થળે દોડી ગયો હતો જ્યાં મૃતક દંપતિના મૃતદેહને નજીકના દવાખાને પીએમ માટે રવાના કરી દેવામાં આવ્યાં હતાં.

આ સંબંધે રાજેશબાઈ રાયસિંહ પરમારે લીમખેડા પોલીસ મથકે ફરિયાદ નોંધાંવતાં પોલીસે ગુનો નોંધી આગળની કાયદેસરની કાર્યવાહી હાથ ધરી છે.