લીમખેડાના દુધિયા ગામે માર્ગ અકસ્માતમાં એકનું મોત

દાહોદ તા.૨૨

લીમખેડા તાલુકાના દુધિયા ગામે એક ટેમ્પાના ચાલકે પોતાના કબજાનો ટેમ્પો પુરઝડપે અને ગફલત ભરી રીતે હંકારી લાવી ત્યાંથી પસાર થઈ રહેલ એક મોટરસાઈકલને અડફેટમાં લેતાં મોટરસાઈકલ પર સવારે ત્રણ પૈકી એકને ગંભીર ઈજાઓ થતાં ઘટના સ્થળ પરજ તેનું કમકમાટી ભર્યું મોત નીપજ્યું હતું જ્યારે અન્ય બે ઈજાગ્રસ્તોને નજીકના દવાખાને સારવાર અર્થે ખસેડવામાં આવ્યાં હોવાનું જાણવા મળી રહ્યું છે.

લીમખેડા તાલુકાના પાડલીયા ગામે નદી ફળિયામાં રહેતા દિનેશભાઈ મનુભાઈ નિનામા, મુકેશભાઈ નારૂભાઈ મછાર અને અક્ષયકુમાર ઈશ્વરભાઈ સોલંકી આ ત્રણેય જણા ગત તા.૨૦મી માર્ચના રોજ પોતાના કબજાની એક મોટરસાઈકલ પર સવાર થઈ દુધિયા હાંડી ફળિયાના માર્ગ પરથી પસાર થઈ રહ્યાં હતાં તે સમયે ત્યાંથી એક ટેમ્પાના ચાલકે પોતાના કબજાનો ટેમ્પો પુરઝડપે અને ગફલત ભરી રીતે હંકારી પસાર થતાં ટેમ્પાના ચાલકે આ મોટરસાઈકલને અડફેટમાં લઈ જાેશભેર ટક્કર મારતાં મોટરસાઈકલ પર સવાર ત્રણેય જણા જમીન પર ફંગોળાયાં હતાં અને જેને પગલે દિનેશભાઈને શરીરે અને માથાના ભાગે ગંભીર જીવલેણ ઈજાઓ થતાં તેઓનું ઘટના સ્થળ પરજ કમકમાટી ભર્યું મોત નીપજ્યું હતું જ્યારે મુકેશભાઈ અને અક્ષયકુમારને શરીરે ઈજાઓ પહોંચતાં તેઓને નજીકના દવાખાને સારવાર અર્થે ખસેડવામાં આવ્યાં હતાં.
આ સંબંધે પાડલીયા ગામે નદી ફળિયામાં રહેતા મિથુનભાઈ દિતાભાઈ નિનામાએ લીમખેડા પોલીસ મથકે ફરિયાદ નોંધાવતાં પોલીસે ગુનો નોંધી તપાસ હાથ ધરી છે.