શ્રી સંતરામ વિદ્યાલયના ૪૪ વિદ્યાર્થીઓએ રાજ્યપાલના હસ્તે ‘રાજ્ય પુરસ્કાર’ મેળવી સંસ્થાનું ગૌરવ વધાર્યું

નરેશ ગનવાણી નડિયાદ

ગુજરાત રાજ્ય ભારત સ્કાઉટ ગાઈડ સંઘ દ્વારા તાજેતરમાં રાજભવન ખાતે આયોજિત એક સમારોહમાં શ્રી સંતરામ વિદ્યાલયના વિદ્યાર્થીઓએ ઝળહળતી સફળતા પ્રાપ્ત કરી છે. સંસ્થાના કુલ ૪૪ વિદ્યાર્થીઓને ગુજરાતના મહામહિમ રાજ્યપાલ  આચાર્ય દેવવ્રતજીના હસ્તે પ્રતિષ્ઠિત ‘રાજ્ય પુરસ્કાર’ એનાયત કરવામાં આવ્યો હતો.
શનિવાર, ૧૩ માર્ચ ૨૦૨૬ના રોજ આયોજિત આ કાર્યક્રમમાં રાજ્યપાલએ વિદ્યાર્થીઓની શિસ્ત અને સેવાભાવનાની પ્રશંસા કરી હતી. આ પ્રસંગે રાજ્યના પૂર્વ નાયબ મુખ્યમંત્રી નીતિનભાઈ પટેલ પણ વિશેષ અતિથિ તરીકે ઉપસ્થિત રહ્યા હતા અને વિદ્યાર્થીઓને પ્રોત્સાહિત કર્યા હતા.
સંતોના આશીર્વાદ અને હર્ષની લાગણી
વિદ્યાર્થીઓની આ અભૂતપૂર્વ સિદ્ધિ બદલ શ્રી સંતરામ મંદિર અને વિદ્યાલય પરિવારમાં ખુશીનો માહોલ જોવા મળી રહ્યો છે. સંસ્થાના પ્રમુખ પ.પૂ. મહંત રામદાસજી મહારાજ, ઉપપ્રમુખ સંત સત્યદાસજી મહારાજ તથા મંત્રી સંત નિર્ગુણદાસજી મહારાજે વિદ્યાર્થીઓને શ્રી સંતરામ મહારાજની દિવ્ય અખંડ જ્યોતિના આશીર્વાદ પાઠવ્યા હતા.
આ સિદ્ધિ વિદ્યાર્થીઓની સખત મહેનત અને સ્કાઉટ-ગાઈડના સંસ્કારોનું પરિણામ છે. તેઓ ભવિષ્યમાં દેશના જવાબદાર નાગરિક બને તેવી મહારાજશ્રીના ચરણોમાં પ્રાર્થના.
શાળાના આચાર્ય અને શિક્ષકગણે પણ તમામ વિજેતા વિદ્યાર્થીઓને તેમના ઉજ્જવળ ભવિષ્ય માટે શુભેચ્છાઓ પાઠવી હતી. આ સફળતાથી સમગ્ર પંથકમાં સંતરામ વિદ્યાલયની પ્રતિષ્ઠામાં વધારો થયો છે.